Mark 10
1 πΎπ°π· πΎπ°πΉπ½πΈππ πΏππππ°π½π³π°π½π³π π΅π°πΌ πΉπ½ πΌπ°ππΊππΌ πΉπΏπ³π°πΉπ°π π·πΉπ½π³π°π πΉπ°πΏππ³π°π½π°πΏ; πΎπ°π· π²π°π΅π΄πΌπΏπ½ ππΉπΊ π°ππππ° πΌπ°π½π°π²π΄πΉπ½π π³πΏ πΉπΌπΌπ°, πΎπ°π·, ππ π΄ π±πΉπΏπ·ππ , π°ππππ° π»π°πΉππΉπ³π° πΉπ½π. 2πΎπ°π· π³πΏπ°ππ²π°π²π²π°π½π³π°π½π ππ°ππ΄πΉππ°πΉπ΄πΉπ πππ΄π·πΏπ½ πΉπ½π°, ππΊπΏπ»π³πΏ ππΉπΎπ°πΉ πΌπ°π½π½ π΅π΄π½ π°πππ°ππΎπ°π½, πππ°πΉππ°π½π³π°π½π πΉπ½π°. 3πΉπΈ πΉπ π°π½π³π·π°ππΎπ°π½π³π π΅π°πΈ: ππ° πΉπΆπ πΉπ π°π½π°π±π°πΏπΈ πΌπππ΄π? 4πΉπΈ π΄πΉπ π΅π΄πΈπΏπ½: πΌπππ΄π πΏππ»π°πΏπ±πΉπ³π° πΏπ½ππΉπ π±ππΊππ π°πππ°ππ΄πΉπ½π°πΉπ πΌπ΄π»πΎπ°π½ πΎπ°π· π°ππ»π΄ππ°π½. 5πΎπ°π· π°π½π³π·π°ππΎπ°π½π³π πΉπ΄ππΏπ π΅π°πΈ π³πΏ πΉπΌ: π πΉπΈππ° π·π°ππ³πΏπ·π°πΉπππ΄πΉπ½ πΉπΆπ π°ππ° π²π°πΌπ΄π»πΉπ³π° πΉπΆπ πΉπ πΈπ π°π½π°π±πΏππ½. 6πΉπΈ π°π π°π½π°ππππ³π΄πΉπ½π°πΉ π²π°ππΊπ°πππ°πΉπ π²πΏπΌπ΄πΉπ½ πΎπ°π· π΅πΉπ½π΄πΉπ½ π²π°ππ°π πΉπ³π° π²πΏπΈ. 7πΉπ½πΏπ· πΈπΉπ π±πΉπ»π΄πΉπΈπ°πΉ πΌπ°π½π½π° π°πππΉπ½ ππ΄πΉπ½π°πΌπΌπ° πΎπ°π· π°πΉπΈπ΄πΉπ½ ππ΄πΉπ½π°πΉ, 8πΎπ°π· ππΉπΎπ°πΉπ½π° πΈπ ππ π° π³πΏ π»π΄πΉπΊπ° ππ°πΌπΉπ½, ππ π°ππ π΄ πΈπ°π½π°ππ΄πΉπΈπ π½πΉ ππΉπ½π³ ππ π°, π°πΊ π»π΄πΉπΊ π°πΉπ½. 9πΈπ°ππ΄πΉ π½πΏ π²πΏπΈ π²π°π π°πΈ, πΌπ°π½π½π° πΈπ°πΌπΌπ° π½πΉ ππΊπ°πΉπ³π°πΉ. 10πΎπ°π· πΉπ½ π²π°ππ³π° π°ππππ° ππΉπππ½πΎππ πΉπ π±πΉ πΈπ°ππ° ππ°πΌπ πππ΄π·πΏπ½ πΉπ½π°. 11πΎπ°π· π΅π°πΈ π³πΏ πΉπΌ: ππ°ππ°πΆπΏπ· ππ°π΄πΉ π°ππ»π΄ππΉπΈ π΅π΄π½ ππ΄πΉπ½π° πΎπ°π· π»πΉπΏπ²π°πΉπΈ π°π½πΈπ°ππ°, π·πππΉπ½ππΈ π³πΏ πΈπΉπΆπ°πΉ. 12πΎπ°π· πΎπ°π±π°πΉ π΅πΉπ½π π°ππ»π΄ππΉπΈ π°π±π°π½ ππ΄πΉπ½π°π½π° πΎπ°π· π»πΉπΏπ²π°π³π° π°π½πΈπ°ππ°πΌπΌπ°, π·πππΉπ½ππΈ. 13πΈπ°π½πΏπ· π°ππ±π΄ππΏπ½ π³πΏ πΉπΌπΌπ° π±π°ππ½π°, π΄πΉ π°πππ°πΉπππΊπΉ πΉπΌ: πΉπΈ πΈπ°πΉ ππΉπππ½πΎππ πΉπ πππΊπΏπ½ πΈπ°πΉπΌ π±π°πΉππ°π½π³π°πΌ π³πΏ. 14 π²π°ππ°πΉππ°π½π³π πΈπ°π½ πΉπ΄ππΏπ πΏπ½π π΄ππΉπ³π° πΎπ°π· π΅π°πΈ π³πΏ πΉπΌ: π»π΄ππΉπΈ πΈπ π±π°ππ½π° π²π°π²π²π°π½ π³πΏ πΌπΉπ πΎπ°π· π½πΉ π π°ππΎπΉπΈ πΈπ, πΏπ½ππ΄ πΈπΉπΆπ΄ πΉππ πΈπΉπΏπ³π°π½π²π°ππ³πΉ π²πΏπ³πΉπ. 15π°πΌπ΄π½, π΅πΉπΈπ° πΉπΆπ πΉπ: ππ°π΄πΉ π½πΉ π°π½π³π½πΉπΌπΉπΈ πΈπΉπΏπ³π°π½π²π°ππ³πΎπ° π²πΏπ³πΉπ ππ π΄ π±π°ππ½, π½πΉ πΈπ°πΏπ· π΅πΉπΌπΉπΈ πΉπ½ πΉπΆπ°πΉ. 16πΎπ°π· π²π°πΈπ»π°πΉπ·π°π½π³π πΉπΌ, π»π°π²πΎπ°π½π³π π·π°π½π³πΏπ½π π°π½π° πΈπ πΈπΉπΏπΈπΉπ³π° πΉπΌ. 17πΎπ°π· πΏππ²π°π²π²π°π½π³πΉπ½ πΉπΌπΌπ° πΉπ½ π πΉπ², π³πΏπ°πππΉπ½π½π°π½π³π π°πΉπ½π πΎπ°π· πΊπ½πΏπππΎπ°π½π³π π±π°πΈ πΉπ½π° π΅πΉπΈπ°π½π³π: π»π°πΉππ°ππΉ πΈπΉπΏπΈπ΄πΉπ²π°, ππ° ππ°πΏπΎπ°πΏ π΄πΉ π»πΉπ±π°πΉπ½π°πΉπ π°πΉπ π΄πΉπ½ππ½π π°ππ±πΎπ° π π°πΉππΈπ°πΏ? 18πΉπΈ πΉπ π΅π°πΈ π³πΏ πΉπΌπΌπ°: ππ° πΌπΉπΊ π΅πΉπΈπΉπ πΈπΉπΏπΈπ΄πΉπ²π°π½π°? π½πΉ ππ°ππ·πΏπ½ πΈπΉπΏπΈπ΄πΉπ²π, π°π»πΎπ° π°πΉπ½π π²πΏπΈ. 19πΈππ π°π½π°π±πΏππ½πΉπ½π πΊπ°π½π: π½πΉ π·πππΉπ½ππ; π½πΉ πΌπ°πΏππΈππΎπ°πΉπ; π½πΉ π·π»πΉππ°πΉπ; π½πΉ ππΉπΎπ°πΉπ π²π°π»πΉπΏπ²π°π π΄πΉππ ππ³π; π½πΉ π°π½π°πΌπ°π·ππΎπ°πΉπ; ππ π΄ππ°πΉ π°πππ°π½ πΈπ΄πΉπ½π°π½π° πΎπ°π· π°πΉπΈπ΄πΉπ½ πΈπ΄πΉπ½π°. 20πΈπ°ππΏπ· π°π½π³π·π°ππΎπ°π½π³π π΅π°πΈ π³πΏ πΉπΌπΌπ°: π»π°πΉππ°ππΉ, πΈπ π°π»π»π° π²π°ππ°πππ°πΉπ³π° πΏπ πΎπΏπ½π³π°πΉ πΌπ΄πΉπ½π°πΉ. 21πΉπΈ πΉπ΄ππΏπ πΉπ½ππ°πΉππ°π½π³π π³πΏ πΉπΌπΌπ° πππΉπΎππ³π° πΉπ½π° πΎπ°π· π΅π°πΈ π³πΏ πΉπΌπΌπ°: π°πΉπ½πΉπ πΈπΏπ π π°π½ πΉππ; π²π°π²π², ππ π° ππΉπ»πΏ ππ π΄ π·π°π±π°πΉπ πππ°π±πΏπ²π΄πΉ πΎπ°π· π²πΉπ πΈπ°ππ±π°πΌ, πΎπ°π· π·π°π±π°πΉπ π·πΏπΆπ³ πΉπ½ π·πΉπΌπΉπ½π°πΌ; πΎπ°π· π·πΉππΉ π»π°πΉπππΎπ°π½ πΌπΉπΊ π½πΉπΌπ°π½π³π π²π°π»π²π°π½. 22πΉπΈ πΉπ π²π°π·π½πΉππ½π°π½π³π πΉπ½ πΈπΉπ π π°πΏππ³πΉπ π²π°π»π°πΉπΈ π²π°πΏππ; π π°π π°πΏπΊ π·π°π±π°π½π³π ππ°πΉπ·πΏ πΌπ°π½π°π². 23πΎπ°π· π±πΉππ°πΉππ°π½π³π πΉπ΄ππΏπ π΅π°πΈ ππΉπππ½πΎπ°πΌ ππ΄πΉπ½π°πΉπΌ: ππ°πΉ, ππ°πΉπ π° π°π²π»πΏπ±π° πΈπ°πΉ ππ°πΉπ·π π²π°π·π°π±π°π½π³π°π½π πΉπ½ πΈπΉπΏπ³π°π½π²π°ππ³πΎπ° π²πΏπ³πΉπ π²π°π»π΄πΉπΈπ°π½π³. 24πΉπΈ πΈπ°πΉ ππΉπππ½πΎππ π°πππ»π°πΏπΈπ½ππ³π΄π³πΏπ½ πΉπ½ π π°πΏππ³π΄ πΉπ. πΈπ°ππΏπ· πΉπ΄ππΏπ π°ππππ° π°π½π³π·π°ππΎπ°π½π³π π΅π°πΈ πΉπΌ: π±π°ππ½πΉπ»ππ½π°, ππ°πΉπ π° π°π²π»πΏ πΉππ πΈπ°πΉπΌ π·πΏπ²πΎπ°π½π³π°πΌ π°ππ°π ππ°πΉπ·π°πΏ πΉπ½ πΈπΉπΏπ³π°π½π²π°ππ³πΎπ° π²πΏπ³πΉπ π²π°π»π΄πΉπΈπ°π½. 25π°πΆπΉππΉπΆπ πΉππ πΏπ»π±π°π½π³π°πΏ πΈπ°πΉππ· πΈπ°πΉππΊπ π½π΄πΈπ»ππ π²π°π»π΄πΉπΈπ°π½, πΈπ°πΏ π²π°π±πΉπ²π°πΌπΌπ° πΉπ½ πΈπΉπΏπ³π°π½π²π°ππ³πΎπ° π²πΏπ³πΉπ π²π°π»π΄πΉπΈπ°π½. 26πΉπΈ π΄πΉπ πΌπ°πΉπ πΏππ²π΄πΉππ½ππ³π΄π³πΏπ½ π΅πΉπΈπ°π½π³π°π½π π³πΏ ππΉπ πΌπΉπππ: πΎπ°π· ππ°π πΌπ°π² π²π°π½πΉππ°π½? 27 πΉπ½ππ°πΉππ°π½π³π π³πΏ πΉπΌ πΉπ΄ππΏπ π΅π°πΈ: [π°πΊπ΄πΉ] πππ°πΌ πΌπ°π½π½π°π½ πΏπ½πΌπ°π·ππ΄πΉπ² πΉππ, π½πΉ πππ°πΌ π²πΏπ³π°; π°π»π»π°ππ° π°πΏπΊ πΌπ°π·ππ΄πΉπ² πΉππ πππ°πΌ π²πΏπ³π°. 28π³πΏπ²π°π½π½ πΈπ°π½ ππ°πΉπππΏπ π΅πΉπΈπ°π½ π³πΏ πΉπΌπΌπ°: ππ°πΉ, π π΄πΉπ π°ππ»π°πΉπ»πππΏπΌ π°π»π»π° πΎπ°π· π»π°πΉπππΉπ³π΄π³πΏπΌ πΈπΏπΊ. 29 π°π½π³π·π°ππΎπ°π½π³π πΉπΌ πΉπ΄ππΏπ π΅π°πΈ: π°πΌπ΄π½, π΅πΉπΈπ° πΉπΆπ πΉπ: π½πΉ ππ°ππ·πΏπ½ πΉππ ππ°π΄πΉ π°ππ»π°πΉπ»πππΉ π²π°ππ³ π°πΉπΈπΈπ°πΏ π±πππΈππΏπ½π π°πΉπΈπΈπ°πΏ π°πΉπΈπ΄πΉπ½ π°πΉπΈπΈπ°πΏ π°πππ°π½ π°πΉπΈπΈπ°πΏ π΅π΄π½ π°πΉπΈπΈπ°πΏ π±π°ππ½π° π°πΉπΈπΈπ°πΏ π·π°πΉπΌππΈπ»πΎπ° πΉπ½ πΌπ΄πΉπ½π° πΎπ°π· πΉπ½ πΈπΉπΆππ π°πΉπ π°π²π²π΄π»πΎππ½π, 30ππ°π΄πΉ π½πΉ π°π½π³π½πΉπΌπ°πΉ Β·πΒ· ππ°π»πΈ π½πΏ πΉπ½ πΈπ°πΌπΌπ° πΌπ΄π»π° π²π°ππ³πΉπ½π πΎπ°π· π±πππΈππΏπ½π πΎπ°π· ππ πΉππππΏπ½π πΎπ°π· π°πππ°π½ πΎπ°π· π°πΉπΈπ΄πΉπ½ πΎπ°π· π±π°ππ½π° πΎπ°π· π·π°πΉπΌππΈπ»πΎπ° πΌπΉπΈ π ππ°πΊππΌ πΎπ°π· πΉπ½ π°πΉπ π° πΈπ°πΌπΌπ° π°π½π°π π°πΉππΈπΉπ½ π»πΉπ±π°πΉπ½ π°πΉπ π΄πΉπ½ππ½. 31π°πΈπΈπ°π½ πΌπ°π½π°π²π°πΉ π π°πΉππΈπ°π½π³ πππΏπΌπ°π½π π°πππΏπΌπ°π½π, πΎπ°π· π°πππΏπΌπ°π½π πππΏπΌπ°π½π. 32 π π΄ππΏπ½πΏπΈ~πΈπ°π½ π°π½π° π πΉπ²π° π²π°π²π²π°π½π³π°π½π π³πΏ πΉπ°πΉππΏππ°πΏπ»π πΌπ°πΉ πΎπ°π· ππ°πΏππ±πΉπ²π°π²π²π°π½π³π πΉπ½π πΉπ΄ππΏπ, πΎπ°π· ππΉπ»π³π°π»π΄πΉπΊπΉπ³π΄π³πΏπ½ πΎπ°π· π°ππ°ππ»π°πΉπππΎπ°π½π³π°π½π ππ°πΏππ·ππ°πΉ π π°πΏππΈπΏπ½. πΎπ°π· π°π½π³π½πΉπΌπ°π½π³π π°ππππ° πΈπ°π½π ππ π°π»πΉπ π³πΏπ²π°π½π½ πΉπΌ π΅πΉπΈπ°π½ πΈππ΄πΉ π·π°π±π°πΉπ³π΄π³πΏπ½ πΉπ½π° π²π°π³π°π±π°π½. 33 πΈπ°ππ΄πΉ ππ°πΉ, πΏππ²π°π²π²π°πΌ πΉπ½ πΉπ°πΉππΏππ°πΏπ»π πΌπ° πΎπ°π· ππΏπ½πΏπ πΌπ°π½π π°ππ²πΉπ±π°π³π° πΈπ°πΉπΌ πΏππ°ππ²πΏπ³πΎπ°πΌ πΎπ°π· π±ππΊπ°ππΎπ°πΌ, πΎπ°π· π²π°π π°ππ²πΎπ°π½π³ πΉπ½π° π³π°πΏπΈπ°πΏ πΉπ½π° πΈπΉπΏπ³ππΌ> 34πΎπ°π· π±πΉπ»π°πΉπΊπ°π½π³ πΉπ½π° πΎπ°π· π±π»πΉπ²π²π π°π½π³ πΉπ½π° πΎπ°π· πππ΄πΉπ π°π½π³ π°π½π° πΉπ½π° πΎπ°π· πΏππ΅πΉπΌπ°π½π³ πΉπΌπΌπ°, πΎπ°π· πΈππΉπ³πΎπΉπ½ π³π°π²π° πΏπππ°π½π³πΉπΈ. 35πΎπ°π· π°ππ·π°π±π°πΉπ³π΄π³πΏπ½ ππΉπΊ π³πΏ πΉπΌπΌπ° πΉπ°πΊππ±πΏπ πΎπ°π· πΉππ·π°π½π½π΄π, ππΏπ½πΎπΏπ πΆπ°πΉπ±π°πΉπ³π°πΉπ°πΏπ, π΅πΉπΈπ°π½π³π°π½π: π»π°πΉππ°ππΉ, π πΉπ»π΄πΉπΌπ° π΄πΉ πΈπ°ππ΄πΉ πΈπΏπΊ π±πΉπ³πΎππ, ππ°πΏπΎπ°πΉπ πΏπ²π²πΊπΉπ. 36πΉπΈ πΉπ΄ππΏπ π΅π°πΈ πΉπΌ: ππ° π πΉπ»π΄πΉππ ππ°πΏπΎπ°π½ πΌπΉπΊ πΉπ²π΅πΉπ? 37πΉπΈ π΄πΉπ π΅π΄πΈπΏπ½ π³πΏ πΉπΌπΌπ°: πππ°π²πΉπ πΏπ²πΊπΉπ π΄πΉ π°πΉπ½π π°π ππ°πΉπ·ππ ππ½ πΈπ΄πΉπ½π°πΉ πΎπ°π· π°πΉπ½π π°π π·π»π΄πΉπ³πΏπΌπ΄πΉπ½ πΈπ΄πΉπ½π°πΉ ππΉππ°πΉπ π° πΉπ½ π πΏπ»πΈπ°πΏ πΈπ΄πΉπ½π°πΌπΌπ°. 38πΉπΈ πΉπ΄ππΏπ π΅π°πΈπΏπ· π³πΏ πΉπΌ: π½πΉ π πΉππΏππ ππΉπ π±πΉπ³πΎπ°ππ: πΌπ°π²πΏπππΏ π³ππΉπ²π²πΊπ°π½ πππΉπΊπ» πΈπ°π½π΄πΉ πΉπΊ π³ππΉπ²π²πΊπ°, πΎπ°π· π³π°πΏππ΄πΉπ½π°πΉ πΈπΉπΆπ°πΉπ΄πΉ πΉπΊ π³π°πΏππΎπ°π³π°, π΄πΉ π³π°πΏππΎπ°πΉπ½π³π°πΏ? 39 πΉπΈ π΄πΉπ π΅π΄πΈπΏπ½ π³πΏ πΉπΌπΌπ°: πΌπ°π²πΏ. πΉπΈ πΉπ΄ππΏπ π΅π°πΈπΏπ· π³πΏ πΉπΌ: ππ π΄πΈπ°πΏπ· πΈπ°π½π° πππΉπΊπ» πΈπ°π½π΄πΉ πΉπΊ π³ππΉπ²π²πΊπ°, π³ππΉπ²π²πΊπ°ππ πΎπ°π· πΈπΉπΆπ°πΉ π³π°πΏππ΄πΉπ½π°πΉ πΈπΉπΆπ°πΉπ΄πΉ πΉπΊ π³π°πΏππΎπ°π³π° ; 40πΉπΈ πΈπ°ππ° π³πΏ ππΉππ°π½ π°π ππ°πΉπ·ππ ππ½ πΌπ΄πΉπ½π°πΉ π°πΉπΈπΈπ°πΏ π°π π·π»π΄πΉπ³πΏπΌπ΄πΉπ½ π½πΉππ πΌπ΄πΉπ½ π³πΏ π²πΉπ±π°π½, π°π»πΎπ° πΈπ°πΉπΌπ΄πΉ πΌπ°π½π πΉπΈ π π°π. 41πΎπ°π· π²π°π·π°πΏππΎπ°π½π³π°π½π πΈπ°πΉ ππ°πΉπ·πΏπ½ π³πΏπ²πΏπ½π½πΏπ½ πΏπ½π π΄ππΎπ°π½ π±πΉ πΉπ°πΊππ±πΏ πΎπ°π· πΉππ·π°π½π½π΄π½. 42 πΉπΈ πΉπ π°ππ·π°πΉππ°π½π³π πΉπ½π π΅π°πΈ π³πΏ πΉπΌ: π πΉππΏπΈ πΈπ°ππ΄πΉ πΈπΏπ²π²πΊπΎπ°π½π³ ππ΄πΉπΊπΉπ½ππ½ πΈπΉπΏπ³ππΌ, π²π°πππ°πΏπΎπΉπ½ππ½π³ πΉπΌ, πΉπΈ πΈπ°πΉ πΌπΉπΊπΉπ»π°π½π πΉπΆπ΄ π²π°π π°π»π³π°π½π³ πΉπΌ. 43πΉπΈ π½πΉ ππ π° ππΉπΎπ°πΉ πΉπ½ πΉπΆπ πΉπ; π°πΊ ππ°ππ°πΆπΏπ· ππ°π΄πΉ π πΉπ»πΉ π π°πΉππΈπ°π½ πΌπΉπΊπΉπ»π πΉπ½ πΉπΆπ πΉπ, ππΉπΎπ°πΉ πΉπΆπ π°π π°π½π³π±π°π·ππ; 44πΎπ°π· ππ°π΄πΉ π πΉπ»πΉ πΉπΆπ π°ππ° π π°πΉππΈπ°π½ πππΏπΌπΉπππ, ππΉπΎπ°πΉ π°π»π»π°πΉπΌ ππΊπ°π»πΊπ. 45πΎπ°π· π°πΏπΊ ππΏπ½πΏπ πΌπ°π½π π½πΉ π΅π°πΌ π°π π°π½π³π±π°π·ππΎπ°πΌ, π°πΊ π°π½π³π±π°π·ππΎπ°π½ πΎπ°π· π²πΉπ±π°π½ ππ°πΉπ π°π»π° ππ΄πΉπ½π° ππ°πΏπ πΌπ°π½π°π²π°π½π π»πΏπ½. 46 πΎπ°π· π΅π΄πΌπΏπ½ πΉπ½ πΉπ°πΉππΉπΊππ½. πΎπ°π· πΏππ²π°π²π²π°π½π³πΉπ½ πΉπΌπΌπ° πΎπ°πΉπ½πΈππ πΌπΉπΈ ππΉπππ½πΎπ°πΌ ππ΄πΉπ½π°πΉπΌ πΎπ°π· πΌπ°π½π°π²π΄πΉπ½ π²π°π½ππ·π°πΉ, ππΏπ½πΏπ ππ΄πΉπΌπ°πΉπ°πΏπ, π±π°πππ΄πΉπΌπ°πΉ[π°]πΏπ π±π»πΉπ½π³π°, ππ°π ππ°πΏπ π πΉπ² π³πΏ π°πΉπ·ππππ½. 47πΎπ°π· π²π°π·π°πΏππΎπ°π½π³π πΈπ°ππ΄πΉ πΉπ΄ππΏπ ππ° π½π°πΆπππ°πΉπΏπ πΉππ, π³πΏπ²π°π½π½ π·ππππΎπ°π½ πΎπ°π· π΅πΉπΈπ°π½: ππΏπ½π°πΏ π³π°π π΄πΉπ³πΉπ, πΉπ΄ππΏ, π°ππΌπ°πΉ πΌπΉπΊ! 48πΎπ°π· ππππΉπ³π΄π³πΏπ½ πΉπΌπΌπ° πΌπ°π½π°π²π°πΉ π΄πΉ π²π°πΈπ°π·π°πΉπ³π΄π³πΉ; πΉπΈ πΉπ ππΉπ»πΏ πΌπ°πΉπ π·ππππΉπ³π°: ππΏπ½π°πΏ π³π°π π΄πΉπ³πΉπ, π°ππΌπ°πΉ πΌπΉπΊ! 49πΎπ°π· π²π°πππ°π½π³π°π½π³π πΉπ΄ππΏπ π·π°πΉπ·π°πΉπ π°ππ πππΎπ°π½ πΉπ½π°. πΎπ°π· π πππΉπ³π΄π³πΏπ½ πΈπ°π½π° π±π»πΉπ½π³π°π½, π΅πΉπΈπ°π½π³π°π½π π³πΏ πΉπΌπΌπ°: πΈππ°ππππ΄πΉ πΈπΏπΊ; πΏπππ΄πΉπ, π πππ΄πΉπΈ πΈπΏπΊ. 50πΉπΈ πΉπ π°ππ π°πΉπππ°π½π³π π π°πππΎπ°πΉ ππ΄πΉπ½π°πΉ πΏππ·π»π°πΏππ°π½π³π π΅π°πΌ π°π πΉπ΄ππΏ. 51πΎπ°π· π°π½π³π·π°ππΎπ°π½π³π π΅π°πΈ π³πΏ πΉπΌπΌπ° πΉπ΄ππΏπ: ππ° π πΉπ»π΄πΉπ π΄πΉ ππ°πΏπΎπ°πΏ πΈπΏπ? πΉπΈ ππ° π±π»πΉπ½π³π° π΅π°πΈ π³πΏ πΉπΌπΌπ°: ππ°π±π±π°πΏπ½π΄πΉ, π΄πΉ πΏπππ°πΉππ°πΏ. 52πΉπΈ πΉπ΄ππΏπ π΅π°πΈ π³πΏ πΉπΌπΌπ°: π²π°π²π², π²π°π»π°πΏπ±π΄πΉπ½π πΈπ΄πΉπ½π° π²π°π½π°ππΉπ³π° πΈπΏπΊ. πΎπ°π· ππΏπ½ππ°πΉπ πΏπππ°π πΎπ°π· π»π°πΉπππΉπ³π° πΉπ½ π πΉπ²π° πΉπ΄ππΏ.
Copyright information for
Wulfila